الدكتورة كاثرين سولانو، من علماء الجنس، تحدثنا عن البظر، أو جهاز متعة الإناث،  ولا (le clitoris)  بالسوري ،إلي هو الجهاز الوحيد في بدنا إلي موجود للمتعة أكهو. على خاطر، الجهاز الجنسي الذكري عندو برشة وظائف: الإنجاب والتبول والمتعة.

و فما برشة عباد ما يعرفوش لشنوة يصلح البظر. برشة نساء تتشكى على خاطر رجالها ما تعرفش وجود البظر أصلاً ولا كيفاش تتعامل معاه. وبما انو لا حياء في الدين، حبينا نحكيو بطريقة علمية على هل المنطقة الحساسة.

أما باش يكون في بالكم، المتعة الجنسية الأنثوية تتعدى أساساً بالبظر، كيما تتعدى بالقضيب عند الراجل. والعلاقة الجنسية إلي ما يشاركش فيها البظر، كايني ما صارتش، وإلا كاينو ما شاركش فيها القضيب.

كيفاش تنجمو تثيروا البظر؟ هوني إنت ولمرا. فما شكون تحب التحفيز يكون بطريقة سيسة، وفما شكون تخير إنو راجلها ينزل شوية. وفما زادة إلي ما تحبش شكون يدور بيه على خاطر ياسر حساسة في البلاصة هذيكا. وقتها تنجموا تمسوا  البلايص إلي بحذا البظر. وما تنساوش إلي البقعة هذيكا لازمها تكون مبلولة شوية وقت الاثارة، ماكانش تولي توجع. دونك يا إما تكون مبلولة بطبيعتها وإلا لازم تتبل بطريقة أخرى، كيما بمواد التشحيم (les lubrifiants) إلي تتباع في السبيسرية مثلاً. وكان لمرا تتشكى مل جفاف ديمة، مل مستحسن تمشي تعدي عند طبيب نساء وتشوف كان فما مشكلة متاع sécheresse vaginale.

من أهم الحاجات زادة، إنو الاثارة تقعد مديدة، حتى لين لمرا تحس روحها حاضرا للعلاقة…ولا ساعات حتى لين توصل لنشوة، إذا كان الكوبل متفاهم هكا.

وعلى هاذاك، مهم إنو الكوبل يعرفوا بعضهم بالقدى ويسألوا بعضهم شنوا يحبوا: دحنيس ، نزلان ، حركات مدورة، ولا مل يسار لليمين…

وفللخر ما تنساوش إلي في حالة الختان، يقعد 9/10 مل البظر. ولذا المتعة باش تكون أقل أما ما تتنحاش جملة. الجذور تبدى مازلت موجودة دونك قادرة على توفير الإثارة والمتعة والنشوة للمرأة.

ET SI VOUS METTIEZ VOTRE GRAIN DE SEL ?