إذا كان في الدنيا ديما نحلمو بالحب والثروة والسفر وإننا نقوموا بحاجات عظيمة… ننساو إلي ساعات فما هاكل الحاجات الصغيرة إلي نحسوهم ماهمش مهمين أما هوما في الحقيقة يخليونا نحسوا بسعادة كبيرة.

 

1- كي الترتين تطيح مالشيرة الصحيحة.
تعدي ساعة وإنت تطلي في الشكلاطة على الترتين وبعد تفلت من يدك وتطيح وإنت تبدى ترى فيها طايحة وما تنجم تعمل شيء أما… بزهرك تطيح مالشيرة الصحيحة.

2- تلقى “دينار” وإلا “ورقة بو عشرةلاف”
تبدى تثبت في مكاتب سروالك قبل ما تحطوا يتغسل وتلقى “وريقة بوعشرلاف” و إلا “دنوس” يستنى فيك… أقوى إحساس في الدنيا.

3- تعمل بانوا سخون في طمبك شهر ديسمبر
والفرحة هذي تزيد وقتلي تتلف ببشكير سخون، تلبس حوايجك وتدخل في فرشك ليلة أحد قدام فيلم باهي.

4- تقوم عقاب الليل وتتفكر إلي إنت ماتخدمش من غدوة
تقوم مفجوع في الليل وتخمم إلي إنت غدوة لازمك تقوم بكري أما مبعد يرجعلك شاهد العقل وتتفكر إلي غدوة نهار أحد/نهار فيشتى وبالطبيعة مافماش خدمة.

5- المطر تصب بالقوي أما إنت في دارك
تسمع في المطر تصب وإنت في فرشك في الدفاء وكاس حليب بالشكلاطة في يدك و تتفرج في فيلم في التلفزة… موش محلاها عيشتنا؟

6- النسمة في نهار سخون 
تبدى في دارك و”الكليم” ماتخدمش والسخانة تقتل وتجيك نسمة تبردلك الدار الكل… سعادة ما تتشراش بالفلوس!

7- تلقى فيلم تحبو في التلفزة نهارة أحد عشية
تبدى قاعد في الدار قالق نهارة أحد عشية ومافما شيء في التلفزة وبعد تلقى فيلم “Pretty Women“… سعادة لا توصف !

8- تمشي لبيت الراحة بعد ما تعدي نهار كامل محصور(ة)
وخاصةً بعد ما تعدي ساعة في الكار و إلى في كرهبتك وإنت تخمم في اللحظة إلي باش تدخل فيها للدار وتمشي تجري لبيت الراحة…

9- تلقى وين تحط كرهبتك في مأوى خاص
تبدى تدور وتلوج وين باش تحط كرهبتك وتشوف إلي فما برشا كراهب وتستخايل إلي ماكش باش تلقى بلاصة وتولي تخمم في حل لحياتك وبــــــــــــــــــــــــــــــعد… تلقاها “البلاصة” تستنى فيك.
حمدلله فما عدالة في الدنيا هذي !

10- تكتشف غناية جديدة في ألبوم المغني المفضل متاعك
وتولي تسمع فيها كل يوم منغير ما تفد منها وكل ما تسمعها تزيد تعمل عليها جو أكثر.

تنجموا تقراو المقال هذا باللغة الفرنسية هوني :

https://femmesdetunisie.com/top-12-des-petits-plaisirs-de-la-vie/

ET SI VOUS METTIEZ VOTRE GRAIN DE SEL ?