[“Photo : Rachel & Monica dans “Friends]

كل طفلة في الدنيا هذي مهما كان عدد صاحباتها، ديما فما وحدة ملي تعرفها تتخلق بيناتهم علاقة “سبيسيال”. وهذيكا الطفلة إلي بش تولي “سا مايير امي”، حبيبتها، عشيرتها، أختها. وهاو الأدلة إلي تخليك تتأكد إلي هي أقرب صاحبة لك :

  • شافتك في أتعس حالاتك : بالبيجاما المشلفح، بالكلاسط المقطعة ،شعرك كي الغولة، سكرانة، تبكي وتغرد، مهبطة من السماء لقشة، إلخ، إلخ، إلخ.
  •  تقبلك كيفما إنت : بطبيعتك المزمرة وببهاوتك، عمرها ما تحكم عليك. أما زادة كيف تبلبزها هي إلي تعطيك على راسك.
  •  سهرياتكم وحدهم : أفلام وإلا سيريات ديبيل، ما تيسر من المأكولات الدسمة (شكلاطة على فريت على جلاس على بيتزا على قلوب…)، بيجاما، برشة تصاور حكايات فارغة… وراسكم عالي.
  •  تفهموا بعضكم على الرمش : خاصة كي يبداو معاكم برشة عباد وتحبوا تقولوا لبعضكم حاجة (كيما كي يعجبكم طفل)، غزرة برك تكفي.
  •  أقوى ضحكات صارو معاها هي : ديما يشدكم فو رير على حكايات فارغة، تعديو ساعة تضحكوا كي المهبلة، وحتى حد مايفهم شبيكم.
  • خلقتو لغتكم : لغة كلها ألغاز ما تفهموها كان انتوما.
  •  كي تصيرلك أي حاجة باهية وإلا خايبة تكلمها هي : أول عبد يجيك في مخك بش تحكيلو أي حكاية صارتلك. من الاول تحكيلها التفاصيل الكل في التاليفون. ومن بعد تقابلها بش تعاود تحكيلها نفس التفاصيل مرة أخرى أما فاس ا فاس.
  •  ديما تتذكروا في أيامات زمان : كل ما تشوفو بعضكم لازم تبداو تحكيو على العمايل إلي عملتوهم مع بعضكم كيف كنتو صغار. وتخرجوا عاد هاكل التصاور إلي مخبينهم في صندوق بش حد ما يشوف فضايحكم، كيما شعركم كيفاه كان.
  •  تتعاركو : أما ترجعوا تحكيو بعد بدرج.
  •  تعرف أذواقك شربة ماء : في الموزيكا، في الماكلة، في الأولاد… في كل شي. كيما زادة تعرف أسرارك الكل إلي عمرها ماهي بش تحكيهم لحد.

[Lire l’article en français]

ET SI VOUS METTIEZ VOTRE GRAIN DE SEL ?