العرس التونسي شقلالة. تبدا تحضر فيه قبل بعام باش مينقسك شي أما لازم تجيك حاجة أخر دقيقة تركبلك الستراس. كيما هذوما :

1- تجيك العادة الشهرية : ويبداو عاد لوجايع والعصب وهاكل الحبة العزيزة الغالية بين عينيك.

2- الشتاء تصب : جمعة كاملة الشمس تشوي ومافما حتى سحابة. تجي ليلة عرسك والمطر تولي تجبد خيطين من سماء.

3- تنسى ما تستدعاش سلفة عمتك : إلي هي ريتها مرة في حياتك. وتتغشش هي وتتغشش عمتك، وأمك زادة. و برى اش يفضها.

4- الحجامة خرجتك عفشة : قد ما وصيتها، شي. لطزتلك كيلو فون دي تان على وجهك خرجت كلون على حالو. فسخ وعاود، شعندك يستنى فيك…

5- الروبة كبرت عليك : ولا إنت ضعفت عليها. ماهو جاك سقام العرايس جيت نهار عرسك تقيس تلقى روحك وليت مسبوعة. قطع وعاود، شعندك يستنى فيك…

6- السركيلاسيون : عرسك السبعة في البلدية وإنت لا يزي الحجامة خرجتك إمخر ولا يزي تزيد توحل في الثنية. ويبدا الستراس يهز فيك وينفض وهاكل الماكياج يسيل وإنت أمورك في العنبر.

7-نسيتو الخوسة : وصلناشي للبلدية ؟ بديناشي في الرسمي ؟ أيا الحمد لله علينا. وتوا اعطينا هاكل خوسات خلي الواحد يعرس ويقصد ربي. اه… نسيناهم في الدار. ختمت…

8- الحلو فسد : ماشي في بالك متهنية بكوجينة الصالة كليماتيزي، هزيت الحلو على بكري. يتكسر الكليمتيزار وتفسد الماكلة. وبرا لوج منين باش ادبر واش يفضها تو من القيل والقال ليلة كاملة.

9- حظر التجول على غفلة : وقتها لا عندك لا حول ولا قوة. كونشي تعمل عرسك مع فطور الصباح.

10- قالوا الضو باش يقص ليلة كاملة : يا سيدي مش لازم العوادة، بأنقص مصروف. اتو نشطحو على دربوكة. أما الظلام اش عملنا فيه ؟

[Lire l’article en français]

ET SI VOUS METTIEZ VOTRE GRAIN DE SEL ?