فما عباد، كي تبدا الدنيا تبرد يطيروا بالفرحة. يبدو عاد يخرجوا في حوايج الشتاء وينظفوا في الشيمينية ويستناو بالدقيقة والدرج وقتاه يلبسوا المراول الصوف. وفما عباد اخرين، إلي دوبا يوفى الصيف يدبرموا وتولي حالتهم حليلة ويعديو العام يحسبوا في قداه مازل على الدنيا باش تعاود تسخن. شنوا يخلي الناس هاذي تفد مالشتاء ؟ الإجابة في 10 نقاط : 

1- القومان في الصباح : بعد ما عديت ليلة دافية تعمل الكيف تحت الفرشية، تقوم عالصباح باش تمشي تخدم والا تقرا، ويبدى البرد يضرب فيك دوبا تخرج طراطش صوابعك وإنت تودع في فرشك الدمعة في عينك.

2- تتحصر كل دقيقة : البرد معروف يخليك نهار كامل تمشي وتجي على بيت الراحة وتولي قبل ماتشرب أي قطرة ماء تحسبلها ألف حساب. وما نحكيوش عاد على هاكل البرد إلي باش يضربك الغادي.

3- خشمك ديما يجري : مريض والا مش مريض، في الشتاء الواحد يبدا ديما مخنخن والخشم كي الطمطومة يجري من الصباح لليل ويبداو ساكك ومكاتبك ديما معبين بالمحارم.

4- الڨلت : تبدا واقف  تتڨردح تستنى في تاكسي بالسيف شادد هاكل سحابة وتتعدى كرهبة تجري تقمر في ڨلتة ماء واطشك…

5- القلق : يبدا الطقس يعيف وانت شادد الدار الكبي ضاربك وتبدا تتذكر وتتحسر على هاكل سهريات والجو متاع الصيف.

6- عذاب السكر : فهمتوني على شنوا نحكي. كي تبدا الشعرة هاو طولها وترصيلك تشمر على ذراعاتك وتنقي. لا يزي برد لا يزي وجيعة. الصبر وبره…

7- السحابة : تعدي ساعة في النصبة تختار في سحابة وانت مش عاجبك كيفاه باش ترصيلك شتاء كامل تكركر فيها فين تمشي. ونهار من النهارات، يجي ريح مريح كما نعرف انا يفركها من بعضها.

8- الطبعة : قد ما تسايس وترد بالك لازم فما هاكل مرة إلي مش باش تشوف… وتغطس في الطبعة وتمرمد روحك تقول بالعاني.

9- الحوايج : تعدي ساعة في الصباح تختار في شنوا باش تلبس بعد تحط هاكل كبوط الأكحل الطويل وتخرج تقول باتمان. عاد مش كان الواحد يخلي حوايج الدار وهو مرتاح خير ؟

10- البرد : كان باش تخرج باش تبرد، كان باش تعمل بانو بعد باش تبرد، وخلي عاد كان يطلع ما عندكش شوفاج… القسم على الله واكهو.

Lire l’article en français

ET SI VOUS METTIEZ VOTRE GRAIN DE SEL ?