القهوة اللي تدوم 3 سوايع على الاقل

مهندس، تكساجي والا رجل اعمال، التونسي هو تونسي، يحب يشرب قهوته الاكسبراس الالونجي على سوايع. و رد بالك تخمم تسأله كيفاش والا تتجرأ تقوله راك طولت في القعدة  وقتها يجاوبك و هو مستغرب و يأكدلك بلي مازاله في الكاس ينجم يبقى بيه 3 سوايع اخرين

Cafe

السياقة

هذه حكاية اخرى عند التونسي. التونسي يحب يعيش المغامرة و من هوايته تقليق الناس في الكياس. زيقزاق ، يدوبل على الثاني و الثالث و كان لزم الرابع. التونسي يحرق الضوء الاحمر و قبل مايحرقه يسمي باسم الله و ينده. الكود ؟ تي حتى انتي بربي، هكا يصلح كان بش تاخذ رخصة السياقة متعك و الباقي انتي و اللي يقولهولك مخك

Conduite

التاكسي

ماكش تونسي كان ماخذيتش مرة على الأقل السيارة الصفراء التونسية. تهز ايدك، تقول تاكسي و توقفلك التاكسي من المفروض العملية تصير هكا –عينك في عيني و قولي، فما حاجة في تونس تصير كيما باقي دول العالم؟- اكيد لا، التكساجي في تونس يعمل روحه ماشافكش، والا الاتعس ينجم يشوفك يهزك و يحطك بعد يتعدى على روحه، اصلا انتي كمواطن تونسي كيفاش  تتجرأ و توقف تاكسي و انت ماكش في ثنيته ؟ والا و هو ماشي يفطر؟ و كان زهرت معاك و وقفتلك تاكسي، حضر روحك بش تستمتع بمحاضرات و نقاشات على اللي صار و اللي ينجم يصير و اللي مستحيل يصير، اه مالا، هو يعرف كل شيء

taxi-fou

اللبلابي بعد السهرية

اه مالا؟ تكمل هي سهرية من غير اللبلابي؟ يجي منه؟ بعد سهرية في علبة ليلية، عرس والا اي حاجة لازم تتعدى تعمل صحفة لبلابي. اللبلابي هو الحل الوحيد بش يرجعلك قوتك و نشاطك اللي اكيد ضيعتهم في السهرية. و من غدوة حضر روحك لنهير مع وجيعة البطن

Lablebii

تجي في الوقت والا ماتجيش جملا

الرونديفوا العربي المشهور. في الخارج عندك الحق في ربع ساعة متع احترام، في تونس، عندك على الاقل نص ساعة كان سلكتها. لو كان قالولك نتقابلوا مع 11 متع الصباح خوذ راحتك و امشي بعد نص النهار و شوف كان وصلوا شوف لا، اما كان قالولك “ان شاء الله”، ماذابيك ترتاح و تسأل هل انه بش يجي نهار و تتقابلوا فيه والا لا؟

mo

ماكلة القلوب

على كامل التراب التونسي. لو كان جات ماكلة القلوب واجب وطني راهوا التونسي يعمل فيه بصفة أقل. القلوب تمشي معاك للمسرح، السينما،الكرهبة، الخدمة و في السهرية مع العائلة. تقشر القلوب و ترمي في القاعة؟ مبروك هاك خذيت الجنسية التونسية

Glibettes

الدلاع و البارسول في البحر

ماكش تونسي كان ماحفرتش في البحر بش تنصب البارسول و تزيدها الملحفة اللي تغطي عليك الشمس. مع صحابك، مع عائلتك والا حتى وحدك الدلاع حاجة لازمة في البحر كيفها كيف المايو اللي بش تعوم به. بعد ماتكل سندويش التن و الهريسة والا بعد ماتغطس في صحن كسكسي، بش تقلى خير من الدلاع تحلي به ؟

Pastèque

ترجع صحن سلفهولك فارغ ؟ مستحيل

بسكويت اي حاجة تنجم تحطها في الصحن المهم الصحن مايرجعش فارغ. في تونس مستحيل ترجع صحن جابهولك معبي بعد عشاء فارغ. رد بالك تعملها

Cookies

تصبيحة قدام باب الدار

في 40 سخانة من الاحسن ماتكونش في بيتك منغير كليماتيزور تحارب في الوشواش، التصبيحة قدام الباب مع قرطاس قلوب و دبوزة كوكا كولا و تتكلم مع اللي ماشي و اللي جاي هي الحل

التبزنيس

ال”بسسسسسسسست” هي فن تونسي، يقولوها لكل حاجة مقيدة “انثى” عند الدولة، قصيرة، طويلة،بطية،مزيانة والا لا مايهمش … التبزنيس هو عادة تونسية من الصعب التخلي عليها مهمها كان الوضع و مهما كانت الظروف. مالا كيفاش بش تتعدى السهرية مع القلوب و الكوكا منغير التبزنيس على بنت الجيران؟

الكارطة في رمضان و على طول العام

القهوة متع راس النهج، عشرات الطواول المنصوبة و عليها الرامي، وين المشكل؟ اجبد كرسي و اقعد و هبط قهوة ماتخافش بش تشدك سهرية والا صبحية كاملة و عدي وقتك بالرامي. شنوا توا الاربعة متع العشية؟ و الأوراق اللي بش نبعثهم تي موش مشكل

Par Aya Amor Chriki

ET SI VOUS METTIEZ VOTRE GRAIN DE SEL ?