مقابلات العمل هي أصعب مرحلة يتعدى بيها  كل واحد فينا على الأقل مرة في حياتو. أما ساعات المرحلة هذي تنجم تتحول لكابوس وقت إلي المواقف إلي مانحبوهش يصيرولنا… يصيروا. 

هوني نقدمولكم عشرة مواقف خايبة ينجمو يصيروا نهار مقابلة عمل:

1- وجيعة في المعدة :

أي نعم، يجيك إلتهاب في المعدة ليلتها… وترصيلك تاخو في الدوايات إلي عندك الكل وتدعي باش تقوم في الصباح لاباس.

2- الجوع :

كرشك تغروط وباش تموت بالجوع أما تحاول قد ما تنجم باش ماتضهرش وخاصةً باش ماتسمعش عرفك المستقبلي زقازيق عصافر كرشك وتركز في الأهم إلي هو مستقبلك.

3- الصباط : (خاص بالفتيات) 

تكسر كعب الصباط متاعك وإنت طالعة في الدروج تجري… ومن غير ما نقولوا إلي وحدة تجي لمقابلة عمل ساق بساق ماتخليش إنطباع باهي برشا عند العرف… إلا إذا كان العرف عرفة وقتها تنجم تفهم الوضعية من غير ما تقعد تفسرها وتولي تتسمى عندك برشا زهر.

4- تفلت الكار :

تفلت الكار و توصل إمخر و عروقاتك شرتلى… وفي الوضعية هذي تنجم تبدى تراجع في روحك و تحاول تتفكر على شكون صبحت نهارتها !

5- تدخل بعضك في الكلام :

من كثرة الخوف، معادش تعرف تحكي… تنسى المعلومات المهمة إلي يلزمك تقولهم كيما مثلاً تحكي على شهاداتك وبالطبيعة تنسى حاجة اسمها اللغة الفرنسية وتولي “Tu “frances” bien“.

6- تسمع الفياقة وتكمل ترقد :

وبالطبيعة توصل إمخر وترجع الغلطة على الفياقة متاعك قال شنوا مانوقزتش.

7- تبزع القهوة على سوريتك البيضة إلي عديت ليلة كاملة وإنت تحدد فيها :

وشقولك كان تشري مرولة متع صغار؟ بالحق ماأصعبها عيشة الكبار…

8- ما يجيكش النوم :

تعدي ليلة كاملة وإنت تخمم في الموعد متاعك و في شنوا يلزمك تقول وخاصةً شنوا ما يلزمكش تقول… وتقعد حتى للأربعة متع الصباح ما ترقدش وبعد تمشي حالتك حليلة، شعرك داخل بعضو، وجهك أصفر وتاااعب.

9- مخك موش فوقك :

تنسى أوراقك في الدار أي الشهادات متاعك، رسالة تحفيز…إلخ إلخ إلخ وتبدى تحاول باش تنقذ الموقف وتوعد باش تبعث الملف متاعك في أقرب وقت وإنت في قرارة نفسك عارف إلي موش باش يقبلك و إلي باش يقبل هاكل السيد إلي جاء قبل وقت الموعد، ملفو كامل، سوريتو نظيفة بيضة ومحددة، شعرو مستوي وعندو ثقة في روحو أكثر منك.

10- العرف/العرفة قنبلة :

علماً انك متقلق(ة) وخايف(ة) علخر وزيد يلزمك تشد روحك وما تحمارش كل ما عرفتك/عرفك يغزرلك في عينيك.

Par Ghaya Saidi

ET SI VOUS METTIEZ VOTRE GRAIN DE SEL ?