عشرة حاجات تخلي البنات التوانسة ما يحبوش يمشيو للعروسات

8806

[Capture d’écran : New Girl]

في العادة كي تقول عرس تقول زينة ومكياج وشطيح ورديح وجو. أما زادة ساعات فما عباد كي يستدعاوهم لعرس تقولش عليهم قالولهم باش تعاودوا تعديو الباك، خاصة كي يخمو في الحاجات إلي يقلقوا وإلي يحشموا إلي ينجموا يصيرولهم، كيفما هاذم: 

1- يشطحوك بالسيف : تبدا قاعدة على روحك، تقصر في الوقت بالفايسبوك، ويجيوك خالاتك وعماتك وبناتهم والعايلة الكريمة الكل يهبطوك تشطح بالسيف. ويبدا ماشي في بالهم عاملين عليك مزية باش يفرهدوك و انتي وقتها كان تلقى تعطي على ساقيك وتروح تجري.

2- يوكلوك بالسيف : وتراه جرب قول لا ! ويبداو عاد في “كول عيش بنيتي باش تتقسم في ثنين بالضعف” ، في “كعبة سالا موش بش تعملك شي” ، في “برا برك كعيبة بقلاوة على خاطري”… ما في بالهمش إلي إنت ضربتلها شقالة كسكسي وصحن دلاع قبل ما تمشي.

3- اطيح : بعد ربع ساعة وهوما يقرقوا بيك باش تهبط تشطح، تاخذلهم بخاطرهم. يبدا ماشي في بالك باش تعمل تمييلة خفيفة، تصفيقتين وتزغريتة… ترصيلك تتكب قدام الناس الكل. وإنت إلي تستخايل باش تتزرف بالسرقة ترجع لبلاصتك، تلقى صالة كاملة تغزرلك وبالطبيعة الكاميرا تصور.

4- الكولون (collant) يتصنصر : وإنت تبدا مانقيتش وفي بالك جبت الصيد من وذنو كي لبستو. وبرا عاد لوج على شكون عندها كولون زايد تحوس بيه في ساكها. ما كانش ترصيلك تعدي ليلة كاملة مخبية ساقيك بالناب متاع الطاولة.

5- روبتك تتقطع : وانتي حازقة روحك في روبة عندك سنين الله ما لبستهاش ما خممتش في الكارثة إلي باش يعملوها الكيلووات إلي زدتهم كي قصيت مع خطيبك خموس. زعمة بش تلقى شكون تحوس فوقها بإبرة وخيط وإلا باش ترصيلك لافة روحك في شاربة ؟

6- خطيبك القديم مستدعي : وإنت ماشية في الصالة، اطيح كف وغرزة إنت وخموس، مكبوب السعد إلي خلاك ومشى وزدت في جرتو هاكل الكيلووات إلي قطعولك روبتك… وبالطبيعة تبدا معاه شختورتو الجديدة. وبرا عاد إنت تبدا تدعي من غادي باش وجهك ما يزراقش كي يجي يقدملك فيها. ومن غير ما نحكيو على العينين إلي باش تبدا تبتبت فيكم، والتقطيع والترييش…

7- يشبعوك بالأسئلة : “لقيتشي راجل؟”، “فماشي حويجة ؟”، “شبيك لتوا لا عرست ؟”، “مازلت تخمم في خموس؟”.وبرا آش يفكها…

8- لبستك خارجة على الموضوع : ماهو كي إستدعاوك للعرس، سمعت سلامية. ياخي مشيت لبست هاكل قفطان الأحمر العزيز الغالي إلي حرجو مذهب، تلقاها طلعت سهرية سوري والناس الكل لابسين “سامبل”. ترصيلك تشد تركينة و تقعد تدعي باش ما يفضحك حد.

9- المغني يحبك تغني : تبدا قاعدة على روحك تحمد في ربي إلي ما قيمك حد تشطح، سي المغني يضهرلو باش تغني. ويجيك حتى لطاولتك يبدا هو يمد في الميكرو وانت تبعّد… حتى تلقى روحك تغني -وإلا تمعوق-… وفي غناية ما تحبهاش…

10- يحنيولك بالسيف : وإنت تبدا تكره ريحة الحنة منين هبت ودبت. أما “لا، عيب وه، صاحبت العروسة وزيد صبية. لازم تحني، حتى طابع برك.”

Pour lire l’article en français

ET SI VOUS METTIEZ VOTRE GRAIN DE SEL ?