1- تلبس صغيرك الصباح للمكتب

ونجمو نعبرو عليه زادا بالصياح و العياط والبكاء عالصباح، خاطر باش تلبس صغير عمرو 7 وإلا 8 سنين باش يمشي يقرا وماتوصلوش إمخر حاجة ماهيش ساهلة جملا. يبدا يحب يختار لبستو وحدو وينجم يقعد ساعة وهو يختار قال شنوا كبير هو توا.

نصيحتنا حظروا كل شي على بكري وحاولوا تقوموا الصباح قبل الوقت وشوف وشوف.

2- تبديل الحوايج

وفى الصيف والحوايج الخفاف وبدينا ندخلوا في الخريف، عاد حضروا حوايج دافين خاطر شهر سبتمبر هو أكثر شهر الطقس يبدا فيه موش معتدل.

3- الإزدحام المروري (embouteillage)

هي “السيركولسيون” ديما موجودة ومن ميزات الشارع التونسي انك تخرج في أي وقت متع النهار لازم تلقى روحك واحل مع الشعب الكريم، عادى ما نحكيوش عليها وقتلي ترجع القراية وتولي عادي تضرب ساعة وإنت واحل في كرهبتك وهذاك يحب يدوبل عليك على اليمين والأخر على اليسار. والمشكلة هذي مافيهاش نصيحة… يقعدلكم كان تدعيو باش توصلوا بكري.

 

4- الفطور

وفا توقيت الصيف ومعادش تنجموا تروحوا تفطروا في الدار، عاد وقيت باش توليو تخمموا في شنوا باش تهزوا فطور معاكم للخدمة.

نصيحتنا خبز وجبن وكعبات زيتون ولفوه. ماكلة خفيفة وما تطلبش برشا وقت ولا تخمام خاصةً كان عندك صغار لازم تلبسهم (1) وسركولسيون باش تواجها عالصباح (3).

 

 

5- العشاء

كيما الفطور، العشاء زادة لازموا تخمام خاطر معادش تخممو تفطروا وحدكم لازم زادة تعشيو العايلة الكل. والعشاء يعني ماكلة صعيبة ومعقدة. والأصعب إلي لازمكم تطيبو العشاء و ماتنساوش باش تعبيو البانو ال”لولو” وتنشروا الحوايج من المكينة، تكملوا الدوسي متع الحسابات متع “خموس”…

6- وسائل النقل العام (transport)

في تونس باش تتنقلو من نقطة “أ” لنقطة “ب” لازم تحضروا رواحكم نفسانياً. خاطر لا يزي السركولسيون إلي تكثر في العودة المدرسية وزيد عليها التكسيات إلي معادش تلقاهم ومانحكيوش عاد على الكيران ودزني وندزك وهاكل الجملة الشهيرة إلي تسمعوها ديما “قدم… الوسط فارغ”. وكان تخممو باش تشريو بسكلات، ننصحوكم ماتخمموش فيها خاطر في تونس الطرقات المخصصة للدراجات مازلات وماهيش باش تولي من عاداتنا.

7- المصروف

بين الأدوات المدرسية، الحوايج الجدد، التقييد في المكاتب،و مصروف الإتيدات والمصروف العادي متع الشهر…  سبتمبر معروف بالشهر الوحيد إلي باش يوفيلك شهريتك في نهارين ويعركك مع البنكاجي  متاعك عامين.

8- العمل المنزلي

فما إلي يختاروا مرافق باش يرافق صغارهم في العمل المنزلي ومنو يشدهم  من الخمسة للسبعة متع العشية حتى لين تروحوا للدار. أما الحالات هاذم مايعنيوكمش نتوما خاطر ماعندكمش فلوس باش تخلصوا المرافق. عاد باش ترصيلكم ترافقوا وحدكم في صغاركم في الدار بعد ما تعشيوهم وتدوشولهم…. تعرفوا الباقي ماو؟

9- مرضات الصغار 

كيما الكبار، الصغار يمرضوا برشا في شهر سبتمبر وقتلي الطقس يبدى يتبدل. الخشم إلي يجبد، القْراجم إلي تحرق والعينين إلي تحك… نصيحتنا حضروا من الصيف برشا دوايات باش ما تلقاوش رواحكم واحلين مبعد.

10- جدول الأوقات

في جدول الأوقات تبدى المشاكل بالضبط مع الأربعة متع العشية وقتلي باش تبداو تتناقشوا في شكون باش يمشي يروح ب”لولو” من المكتب ؟ خاصةً إلي مايلزمكمش تنساو العشاء والبانو والحوايج إلي في الماكينة…إلخ إلخ إلخ. الحمدلله إلي مامي وعزيزي وعمة موجودين باش يمشيو هوما يروحوا بصغيراتنا.

par Ghaya Saidi

ET SI VOUS METTIEZ VOTRE GRAIN DE SEL ?