(العربية) شلازمك تعمل كي تهبط للفريب

0
7745

التونسي و اللبسة عندهم علاقة كبيرة و هذا الي يخلينا مانفلتوش حتى فرصة متاع شريان دبش : كان في الصولد تلقانا شادين الصف من النهار الأول للنهار الاخر و كان فينا شكون سمع بجارة والا بنت خالة  روحت من تركيا يمشيلها يطل عليها يلقاشي قطعة تتشري و حتى كي الدينار طايح فمة ناس يمشيو لدزاير في كيران باش يوصلوا حدهم حد سوق علمة يسلعوا و يروحو …. Bref و بطبيعة رفيق الزوالي و الغني : البلاصة الي انفتقوا فيها مواهبنا هي الفريب البلاصة الي الناس الكل يشمروا على يديهم و التوانسة الكل ناقفوا فيه لتونس. اما كل بلاصة عندها قواعدها وهاذم حاجات ينجموا يعاونوكم برشا في هبطتكم الجاية

1/ اللبسة

راهو صحيح المشية للفريب تتسمى خرجة اما موش لازم تهبطوا 6/12 على خاتر كل ما لبستك تكون محلاها و مريقة كل ما السوم يغلى. و حاجة أخرى زادة راهو و بالرغم الي نحنا انقولوا “” هيا نعملوا دورة في الفريب”” اما راك باش تعمل سبور المشي و الجري ساعات و توصل الحكاية حتى للتنقيز في وسط النصبة باش تشد قطعة عجبتك, فلذا اللبسة المريحة مطلوبة باش تربح “القطعة الذهبية”

2/ اللغة

هوني فمة حاجتين مهمين : موش لازم نتفرنسوا برشا و انحاولوا نحكيو درا كيفاش ميسالش انحاولوا انبسطوا على الاخر كلامنا و هذا كلوا في مصلحتك و مصلحة مكتوبك و الحاجة الثانية هي اسامي الحاجات ساعات كي تلقا حاجة و انت عندك قداش تلوج عليها ماغير ما تسميها باسمها الحقيقي خاصة كان لقيت مولاها موش فاهمها شنية كي تلقى ” diffuseur de parfum céramique ” قول بربي بقداش الفخار هذا و الا الكاس والا أي حاجة اتيطح من قيمة القطعة

@Mohamed Ali Sghaier (Fripe Hafsia)

3/ السوم

في الفريب تلقى حاجات بالاسوام الكل من 100 فرنك للسبيدري بـ120 الف اما لازمك تراني روحك على حاجة هو انك مهما سمعت سوم غالي والا رخيص لازم تكون عندك نفس الإجابة ” أووووه وهذا اخر سوم ؟؟؟” على خاتر كان سيادتك تفرح الي لقيت صباط درا من اما ماركة ب60 الف و تفرح على خاتر جديد ب350 دينار موش لازم تغلّي علينا الخبز

4/ البيئة

توة برشا ناس يشجعو على الفريب على خاتر هو إعادة استعمال متاع دبش قديم وهذا يخلي انتاج الدبش الجديد ينقص والنتيجة هي في مصلحة البيئة متاعنا. علاش ؟؟؟ الحكاية ساهلة, ياسيدي تعرفشي الي صناعة مريول جديد يوزن 250 غرام تستعمل 2500 ليترا ماء و زيد عليهم  الي في العام باش دبشنا يتصنع يتسيبوا 1.2 مليار طن غاز يسبب الاحتباس الحراري في الهواء و معاهم  نستعملوا 70 مليون برميل ايسونس باش نصنعوا البوليستار الي نلبسوا فيه. لذا الفريب هو الحل والترقيع كي يتقطع سروال ودبشك تعطيه لخوك والا اختك الي أصغر منك ينجم يكون حل زادة

ونحنا صرفنا صرفنا ماذابينا كان انوليو كي نمشيو للفريب انهزو ‘ساك أ دو’ ولا قفة انحطو فيها دبشنا ويزينا من الساشيات البلاستيك الي يتقطع شطرهم في الثنية

 Par Habib Trabelsi