(العربية) خمسة أكلات شعبيّة للسحور

0
1572

من الحاجات إلّي تحيّرنا برشة في رمضان، السحور٠ بأكثر من 13 ساعة في النهار، يولّي اختيارنا لمكوّنات السحور حاجة مهّمة ياسر٠ لازمو يكون صحّي ومتكامل باش يْقنّعنا ويشدّلنا قلوبنا لشقّان الفطر٠ أكثر حاجة لازمنا نركّزوا علاها من شقان الفطر للسحور شربان الماء بكميات باهية وماكلة الغلة بطريقة معتدلة٠ هاذم خمسة اقتراحات لسحور مفيد ومغذي وزيد أكلات دياري وشعبية:

1/ المسفوف بالتمر والفاكية، وكان فمّة نزيدوا رمّان وعنب، هذا مع كاس رايب وإلاّ لبن، سحور قمقوم يعطيكم برشة طاقة ويصبركم لشقان الفطر

2/ صحلب (درع) طيبوه بالماء وإلا بالحليب وزيدوه شامية بالفاكية وإلّا زيت زيتونة وتمر، ومعاه كاس حليب وإلّا ياغرت.

@photo: Blog Fussoir

3/ البسيسة من أحسن الحاجات إلي تنجموا تتسحروا بيهم، تنجّم تكون مبسسّة بزيت الزيتونة والزبيب والفاكية، وإلّا مخلطة بالماء والسكّر مع كعبات غلّة وكاس سيتروناد وإلّا أي نوع مالعصير الفرشك

4/ توّ نجيوا للعصيدة وإلا البازين، وهي أكلة شعبيّة وبرشة ناس يطيبوها وفيها برشة أنواع : عصيدة بالفارينة وزيت الزيتونة والسكّر وإلا عصيدة شعير بالعسل والإكليل والزعتر، وللّي يحب الحار ينجّم يعملها بالشكشوكة

5/ فللخر الكسكسي درع باللبن، يمكن برشة ما يعرفوهش خاطر مازال يتعوّل في الديار آما كي تسألوا تنجموا تلقاوه بالأخص في جهة الوطن القبلي، يتفوّر الكسكسي وبعد يتحطّ في الصحاف ويتصبّ عليه اللبن والسكّر (للّي يحب) ٠ شيء يعمل الكيف، يغذي وزيد يقنّع مع كعبات تمر، تنجموا تصبروا لشقّان الفطر من غير عطش وإلاّ جوع

كونوا متأكّدين إلّي ماكلة بكري كلها منفعة وصحّة وأكيد لاحظتوا إلّي الناس الكبار إلّي محافظين على العادات الغذائية متاعنا أغلبيّتهم يبداوا في صحة جسدية وعقليّة هايلة٠ ويا ليتنا نتعلموا منهم ونرجعوا للعادة والعوايد عالأقلّ في المناسبات هذي٠