(العربية) تسعة حاجات تنجموا تعملوهم مع بعضكم بش ماتقلقوش

0
4727

بعد ما يتعدا شويا وقت و انتم مع بعضكم، و بعد ماتعرفتوا على بعضكم و عرفتوا تقريبا كل شيء على الطرف الاخر، تقريبا توا تكونوا داخلين في مرحلة الروتين. بش ماتضيعوش في المرحلة هذه و تدخلوا في الكلام اللي ماعندوش معنى و التصرفات اللي تنجم  تبعدكم على بعضكم. لهنا تنجموا تلقوا تقريبا شويا حاجات تعملوهم مع بعضكم، بش ماتفدوش و ماتقلقوش و ماتصيرش المشاكل متع الروتين

تجربوا مطاعم جديدة

date copie

حاجة باهية تنجموا تتشاركوها مع بعضكم هي حبكم للماكلة و تجربوا ماكلات جديدة و مطاعم مع بعضكم في خرجاتكم الرومنسية. كي تجربوا بلايص جدد مع بعضكم تنجموا تقربوا لبعضكم اكثر و تعرفوا بعضكم موش كل شيء تنجموا تعرفوه بالكلام

تمشوا لتظاهرات ثقافية

couple-soiree1

فيلم جديد خرج؟ حفلة متع مغني(ة) تحبوه(ا)؟ امشو تفرجوا و اسمعوا موزيكا و اخرجوا ناقشوا الفيلم و اعملوا طاولة و اربعة كراسي عليه .. موش لازم كلامكم الكل يكون على مستقبلكم مع بعضكم و اسامي صغاركم و بشنوا ترقد انتي في الليل، ميسالش اخرجوا للشارع و بدلوا الوجوه و اعرفوا ناس جدد و حاجات جدد و افهمه كيفاش يخمم و شنوا ذوقه و شنيا الحاجات اللي يحبهم

اعملوا السبور مع بعضكم

couple-sport1

 

في بلاد صغيرة كيف تونس موش بالساهل بش تمنع من الروتين، و بعد الغطسة اللي عملتوها مع بعضكم في المطاعم الجديدة وقيت بش تعملوا شويا سبور مع بعضكم زادا. اخرجوا لبلايص مزيانة و خضراء ، على البحر والا على برط سيدي بوسعيد و اعملوا شويا سبور، امشوا للجبل في روندو، اخرجوا من الروتين و من الراحة اللي انتم فيها، تقربوا لبعضكم اكثر و تحافظوا على لياقتكم الجسدية

طيبوا

couple-cuisine1

صحيح موش ديما تلقوا وقت فارغ بش تعدوا نهار كامل في الكوجينة، اما نهار احد مافيها باس كان تدخلوا مع بعضكم للكوجينة و طيبوا حاجات جديدة، جربوا الماكلة الايطالية، اليبانية، الصينية والا الامريكية، ماكمش بش تحيروا في انواع الماكلة اتو تلقوا برشا… حلوا الانترنات و لوجوا على روستات و صحة و بالشفاء، و متنسوش بعد بش تعملوا السبور

اخرجوا حوسوا

couple-promenade1

بين الخدمة، الترنسبور (و عذاب الترنسبور في تونس) و الدار و مشاغلها، تضيعوا و يضيع معاكم برشا حاجات. اخطفوا رواحكم حتى ساعة، سوعتين من زمان موش بش توقف حياتكم، موش بش تتدمر مشاريعكم و موش بش يطردوكم من الخدمة، موش بش يصير شيء، اعملوا دورة، اختاروا بلاصة مزيانة و اخرجوا و بدلوا شويا، يزي من القعدة في القهاوي و رتحوا مخكم

تفرجوا على سيري

couple-serie-tv1

دنيا باردة؟  ماعينكمش في الخروج؟ ماتحبوش تشوفوا برشا ناس و تحبوا تقعدوا وحدكم؟ و تحبوا تبقوا تركشوا في الدفاء؟ نعطوكم الحل الباهي: قهوة، شوكولا سخونة والا بوب-كورن، غطى دافي، سيريات باهين و صحة ليكم الفرجة

Jeux-vidéo

couple-jeux1

فديتوا من السيريات؟ هاو حل اخر، العبوا مع بعضكم، موش لازم ديما تكونوا منظمين و ما احلاكم و كبار و عقلكم ديما فوقكم، ارجعوا لشويا صغر و بعد ماتعدوا نهار كامل طيبوا في الكوجينة تنجموا تلعبوا طرح و اللي يخسر يغسل الماعون

احكوا

couple-discussion1

علاش تعقدوا فيها؟ علاش تصعبوا فيها و هي ساهلة؟ اقعدوا احكوا مع بعضكم، احكوا على كل شيء و خمموا مع بعضكم في كل شيء

سافروا مع بعضكم

Couple on a tropical beach at Maldives
Couple on a tropical beach at Maldives

فديتوا من القعدة في البلاد؟ تحبوا حاجة جديدة ؟ سافروا ، امشوا لبلاصة جديدة مع بعضكم، جربوا بحر جديد والا دولة جديدة، عدوا نهار كامل ضايعين في بلاصة و دوروا دوروا و ترجعوا تلقاو رواحكم مازلتوا في البلاصة هي بيدها و اضحكوا، فما خير من هكا؟

Par Aya Amor Chriki