(العربية) أنواع الناس الي يعملوا تاتواج‎

0
4428

التاتواج عادة قديمة في ثقافتنا وفي العالم الكل اما زادة الفترة الاخيرة ولات موضة ماشية وتكثر بين الناس وخاصة الشبيبة الي كل مرة نكتشفوافيهم حاجات جديدة. وكل واحد عامل تاتواج يسمع نفس الأسئلة كل ماحد يشوف تاتواجو:

-يا عامل(ة) تاتواج؟؟

– شنوة ماعناتها؟؟

– يوجع؟؟

– عند شكون؟؟

– بقداش؟؟؟

وكل مرة الواحد يبدا فادد من الإجابة عليهم, والي كان من الأول يفسر و يوصف و يعبر يولي بعد مدة يجاوب ” أي, أي, شوية, أي … متاع اعطيني بركا انسكرهالموضوع .

المهم انا اليوم حابب انقوللكم على شوية أنواع متاع ناس عاملين تاتواج بالك انت تكون واحد منهم.

1/ انحب على تاتواج اما ماانحبش

الناس هاذم مازالوا خايفين بين انهم يعملوا تاتواج على خاتر عاجبهم والا يحبوا يجربوا وبين انو “حرام” والا مايحبوش حاجة تفعد في بدنهم عمرهم الكل وغالبا ما تلقاهم اول مايراو واحد والا وحدة عاملين تاتواج طول يسألوهم الاسئلة الكلاسيكية الي قلتهملكم الفوق ومن بعد يزيدوا سؤالهم السحري ” فمة واحد متاع 6 شهور؟ “

2/ أولاد مفيدة

“أولاد مفيدة” ولات ماركة متاع نوعية متاع تاتواج تربط بالناس الي عملوا تاتواجاتهم بعد المسلسل و غالبا مايكون كبير على اليد الكل و الا الظهر وتلقاه عقرب والا حنش والا أي حاجة ماشي في بالهم الي هي تعبر على رجوليتهم و فحولتهم و هذا الكل من تأثيرهم بالممثلين الي في المسلسل و الي ماخلطوش على التاتواج على خاتروايتكلف،فمة برشا عملوا الصيف هذاكابالحرقوس و خاصة الصغار .هاوكا باش مايخليوهاش في قلوبهم

3/ oh c’est mimi, c’est sympa

النوع هذا غالبا ما تلقاه في الجنس اللطيف أما حتى في جنس يالطيف موجود منهم (بالرغم الي أنا ما إنحبش التقسمة الجنسية) المهم يعملوا حمامة والا قلب صغير والا موتيف عجبهم على انترنات والا عند ستار و مايخسروش حتى ربع دقيقة باش يخمولها في معنا والا يلوجوا علي رمزيتها .يختاروتاتواجهم تقول عليهم يختارو في دجين و الا مريول، هاوكا حاجة مزيانة قدام اصحابي و ساعات الحاجة الي عاملين عليها جو تتقلب عليهم بالظبط كيما واحد يشري مريوا من الفريب و ماهوش فاهم شنوة مكتوب فيه …..

4/ جماعة قيس قبل ماتخيص

الناس هاذم يضربوا مديدة و هوما يخمموا في تاتواجهم الي باش يعملوه في المعنى متاعوا وفي بلاصتوا على خاتر بالنسبة ليهم كل تاتواج لازموا يرمز عندهم لحاجة والا لحكاية عاشوها و زيد البلاص عندها ليهم أهمية كبيرة, و الناس هاذم بما أنهم مقتنعين 1000 في 100 مايخموش في قداش من تاتواج عندهم و مايلوجوش باش يحطوه في بلايص ضاهرين على خاتر التاتواج ليهم موش للناس

5/ الفلوكة واسم الأم

في المخيال الشعبي فمة نوعية متاع ‘ وشام” يعملوه ولاد الحومة الشعبية إما في الحومة خلال الجلسات الخمرية والا وقت ربطية و التاتواجات هاذم تلقاهم خضر و موش فينو في خدمتهم و فيهم اما حاجة عندها علاقة بالبحر و الحرقة والا اسم الام بأي لغة ماكم تعرفوا أهمية الام في الحوم الشعبية و الفئات المتوسطة وحبهم هذا بالحق صافي و صادق والاد الحوم تجم تمسهم في كل شيء كان في الحنينة.

 

هاذم ناس اختاروا يعملوا تاتواج و الا مايعملوش اما المهم انو كل واحد يكون مقتنع بالي يعمل فيه “أبرا  تو”  التاتواج على بدنوا .و هاني نستنى في النهار الي ماانوليوش نتسومموا علي عامل تاتواج والا نضحكوا على يقول مانحبش انتتوج و كل واحد يتلهى في روحو

 Par Habib Trabelsi