Désolé, cet article est seulement disponible en arabe. Pour le confort de l’utilisateur, le contenu est affiché ci-dessous dans une autre langue. Vous pouvez cliquer le lien pour changer de langue active.

الدنيا بدأت تسخن و تحضر للصيف، و يقولو الصيف ضيف الحمد الله d’ailleurs على خاتر صحيح الصيف نعملوا فيه جو بحر و لمة مع الأصحاب و مهرجانات اما فمة حاجات و مواقف يصيرو لكل إنسان و يخليوه يكره روحو و يكره فيه الصيف و كل شي:

1/ الريحة في الميتروات والبلايص المسكرة. هو من عند ربي نحنا شعب معروف  » بريحة البلاد يابا » و في الصيف يزيد الشي يكثر و التوانسة يخرجو القرينتة إلى فيهم و غالبا كل ما تلقى روحك في بلاصة مسكرة ؛ ميترو ، تاكسي جماعي ، إدارة والا حانوت حجام تكره روحك على خاتر هذا يدخل في العنف الجسدي.

2/ماكش في ثنية التاكسي و انت واقف في غرغور القايلة بعد صبحية و انت مكبوب في البيرو و تستنى في ماضي ساعة بالدقيقة و الدرج باش تروّح تنحي دبشك و تترمي قدام الكليماتيزور و انت لابس مريول خلعة و شورة و قدامك صحن دلاع أبراج أبراج، يجي دور التاكسي إلى مهمتو وقتها يكسرك الحلمة متاعك و يتحول لعصا في وسط العجلة متاع حياتك. و يغبرو من الكياسات و كان طحت بواحد تطلع ماكش في ثنيتو.!! اقعد هكاكا تستاهل باش المرة الجاية تكري دار على ثنية تاكسيست.

3/تسلم على واحد يديه عارقة. قلنا غالبا انو الواحد في الشموسات يبدأ كاره روحو و ماذابيه بأقل احتكاك مع العباد و حتى الممارسات ينقصو كان الواحد ماعندوش كليماتيزور في الدار. اما كلو كوم و انك تقابل حد و يسلم عليك و يديه عارقة و يشدك بالحديث و انت لاتنجم تقولو لا ولاتنجم تمسح يديك قدامو كوم آخر. و هاذم أغلبهم هاك المديرين الي يلبسو كوستيم مارون و كرافت مزوزقة وفيها قطرة زيت من كفتاجي الفطور.

4/يلبك العرق و انت ماتنجمش تروّح. بما انو الناس كل  توصل مرتاحة للخدم متاعها وهذا يرجع لتوفر وسائل النقل العمومي و الخاص فمة ناس إلى بعد ساعة من زمان تلقاهم لبهم العرق و المريول تنفخ و يتعصر و هذا الكل في أول النهار و الدار بعيدة و هذا الي يخلي برشا ناس يهزو معاهم تبديلة للخدمة على ماياتي و يحدث على العبد ساعات.

5/فطورك تلقاه قراص كيما كل نهار و في اطار لمان الفلوس للكونجي، التونسي يقوم يسري عقاب الليل و يشوف شفمة في الفريجدار باش يعبي القابيطاسة متاع الفطور. و الصباح يحط حكتو في ساشي زارا و تبدأ المغامرة باش يوصل للخدمة. وبما انو المؤسسات الكل يوفرو بلايص انحطو فيهم الماكلة و نقعدو نفطرو فيهم، اخيب شعور كي تضربك ريحة القروصية كي تحل الحكة متاعك.

6/ يطيحلك كورنو القلاس في القاعة. في الصيف الفلاسفة و الليموناضة هوما المساندين الرسميين لينا (وسط الجمعة على خاتر في الويكاند البحث يتبدل ههه) عاد قلنا وانت مازال لابك العرق و ريڨتك سايلة على بولة ڨلاس و الكورنو في يدك و oops القلاف اليطيح و يقعد الكورنو فارغ في يدك. شعور خايب برشا و اسأل مجرب

7/ يجيك sms من عند الستاغ باش اتسكر الكليماتيزور. هو من عند ربي العائلات لازم تلقى فيهم شكون مهمتو يصيح و يعيط على الضو إلى يشعل و باب الفريجدار المحلول و الكليماتيزور زادة. اما في الصيف، يجي معاه renfort و الستاغ تبدأ تمرج فيك حطو على ال26، سكرو التلافز بين 13 و ال16 وغير من الميساجات إلى دورهم يفزدولك القايلة.

هاذم حاجات من برشا عشانهم و مازلنا باش انعيشوهم صيف السنة.

Par Habib Trabelsi