Désolé, cet article est seulement disponible en arabe. Pour le confort de l’utilisateur, le contenu est affiché ci-dessous dans une autre langue. Vous pouvez cliquer le lien pour changer de langue active.

عيدكم مبروك! فيسع تعدى رمضان وجانا العيد بمناسباتو وأفراحو٠ وأكيد برشة عايلات بداوا يحضروا لعروسات ولادهم وبناتهم٠ برشةعرايس بداوا يخمموا في الماسكووات إلّي يتعملوا في الدار وإلّي يخليوهم حاضرين للعرس وزيد يسهلوا خدمة لاستيتيسين ٠ هاذي ليستة متاع ماسكووات للبشرة،باش تبدى العروسة منوّرة في ليلة من أهمّ ليالي حياتها٠

1/الباروق، نوع مالبودريتخلّط بماء الورد وبعد ما تغسلوا وجوهكم بالماء الفاتر وتعملوا غسول تقشير تحطوا الخلطة هاذيكا على وجوهكم، تخليوه نصّ ساعة وبعد تغسلوه بالماء الفاتر٠ الماسك هذا ياسر قديم ومعروف إنّو يفتّح البشرة ويضوّيها خاصة كان تبدى العروسة تستعملوا قبل بشهر مالعرس٠ عندو تأثير سحري وتنجموا تعملوه عالبدن الكل٠ الباروق موجود في الأسواق العربي٠

2/إلّي ما لقاتش باروق تنجم تعمل ماسك النشا٠ تجيبوا زوز مغارف نشا تخلطوهم بماء الورد مع شوية ملح خشين وعصرة قارص٠ تحطوا الخلطة على وجوهكم وتدلكوا بشوية بشوية وبعد ربع ساعة أغسلوا وجوهكم بالماء الفاتر٠ الماسك هذا ينحي الوسخ والتراب وينقي البشرة وزيد تنجموا تحطوه مرتين في الجمعة٠

3/البنات إلّي يعانيوا من كحولية في الركايب، الظبابط والمرافق، عنّا ليكم خلطة هايلة٠ مغرفة سكر مع مغرفة قهوة ومغرفة زيت « نوا دو كوكو » (جوز الهند) ، خلطوهم وحطوهم عالبلايص إلي حاجتكم بيهم، وخليوا الخلطة 15 دقيقة، وبعد أفركوا شوية البلاصة، تو تشوفوا القشرة الميتة تنحات بعد شلّلوا بشوية ماء فاتر٠

4/توّ نجيوا للعرايس إلّي بشرتهم شايحة٠ أحسن وأسهل حلّ هو العسل٠ حلّ سحري لبرشة مشاكل متاع بشرة٠ العسل يخلّي البشرة راوية ورطبة، ويرتّحكم مالشياح٠ داوموا عليه باش تبقى بشرتكم ديما منوّرة لليلة العرس٠ من فوايد العسل لخرى تنحية الحبوب٠ قبل ما ترقدوا حطوّا عليهم العسل، وفي الصباح تو تلاحظوا إلّي هوما تنحاوا٠

5/آخر ماسك للبشرة، هو ماسك الفراز، وفيه المنافع الكل للبشرة: ينظف، يرطب، وينحي النفاخ٠ جيبوا تلاثة كعبات فراز صغار ارفسوهم بالفورشات مع مغرفة كبيرة لبن ومغرفة صغيرة عسل٠ بعد حطوا الخلطة على وجوهكم مدة 20 وإلّا 30 دقيقة، بعد أغسلوا بالماء الفاتر٠ عاودوا الماسك تلاثة مرات في الجمعة والنتيجة شتكون مبهرة.