[:ar]

بعد مدة طويلة في الخدمة والريتم القوي، الواحد عندو الحق في ويكاند يرتاح فيه. و حتى كان الطقس بارد لازمك تخرج ,تتفرهد و تنحي ستراس الخدمة و القراية، تبدل شوية الوجوه و تكتشف بلايص ما كنتش تعرفهم و تنسى البيرو و الكرافات و تنحي التالون و تعدي ويكاند ماغير ما تمشي فيه للمرشي ولا تعمل ميناج للدار.

اما المشكل ديما الفلوس ونقعدو انخموا قداش تتكلفلنا المحواسة !!! وهذا مشكل من الحيط على خاتر انجمونتفرهدو باقل ما يمكن من الفلوس و نستعدوا لجمعة فيها برشا خدمة و قراية .وجري وراء الكيران و الحزقة في كوستيم و خنقة الكرفات.

1/ انبرمجو « روندوني » 

اليوم في تونس les randonnées   ولاو موجودين برشا و يمشيو لبرشا بلايص مزيانين كيما في الشمال و الوسط  الغربي زادة. و البلايص هاذم توا وقتهم , وين تلقى برشا خضار و هواء نضيف.

 ما عليك كان تبلس دبش مرتاحين و تهز معاك الماء  و حويجة صغيرة تاكلها و ماتنساش تشرجي تاليفونك باش تعمل برشا تصاور مع الأصحاب.

الروندوني تلقاه يتكلف بين 20 و30 دينار. بش تلقاو مواعيد خرجات، اعملوا طلة هوني:   دوليشة

2/ تعمل « كامبينغ » 

كان تحب تشيخ اكثر بالمناظر متاع الجبال و الغابات و تعيش تجربة يمكن تكون جديدة عليك : سهرية و انتومة دايرين على النار و نومة في خيمة وسط الطبيعة,  تنجم تعمل كامبينغ. و اليوم تلقى شكون مستانسين ينظمواالكامبينغ من اولو لاخرو و يوفرلك الكار و الماكلة و الخيمة , و انت ما عليك كان تجي و تعمل جو مع صحابك و السوم يكون في 45 دينار.

3/ تبرمج خرجة نهار الاحد في قصر قرنبالية 

القصر هذا مطعم و فيه أراضي متاع عنب و بلاصة يصنعو فيها الشراب (cave à vin), و سي رضا مولى  القصر يستقبلكم تعديومعاه نهار  الاحد , يحكيلكم على تاريخ الخمور في تونس و برشا نكت و ضمار و يستدعاكم تذوقو برشا أنواع متاع  مشروبات روحية و بخلاف هذا الكل عندكم في القصر فطور تلقاو فيه المشوي بأنواعه و سلايط و مقرونة. هذا الكل تنجموتلقاوه deal ب25 دينار

وتوة فمة تحسينات عليه ومنّا للصيف باش يتعمل بيسين باش تنجموا تعملوتبحبيحة و قعدة في تيراس القصر. بش تشوفو الجو متاع لقصر، هو الباج متاعهم.

والديل هوني 

3/ تهزوا كرهبتكم وتشدو الثنية 

الحكاية و مافيها هو انك تبرمج مع أصحابك بروقرام خرجة في ويكاند و باش ترتاحو اكثر. البروقرام هذا لازمو ويكاند برولونجي (جمعة,سبت,احد)

اول حاجة تعملوها انكم تختارو البلاصة حسب انتوما  وين و شنوة تحبو ( الجنوب كان تحبو على الصحراء، الشمال الغربي على الغابات و الخضار إلى فيه و كان زهرت معاكم تلقاو شوية ثلج و الكاب بون كان تحبو على بلاصة ترانكيل على البحر، اي البحر عندو شيخة أخرى في الشتاء)

السكن :

في ما يخص السكنة عندكم زوز حلول، اما تاخذو اوتيل في اطار دعم السياحة الداخلية و هذا يجيكم تقريبا في 35 حتى 50 دينار للشخص و الا تكريو دار ما تفوتش 150 دينار للويكاند كامل و انا انحب الثانية.

Maison d'hôtes à Mornag
Maison d’hôtes à Mornag

الماكلة:

اول ما تاخذومفاتح الدارتتعداوتقضيو و تاخذو عولتكم، و هاذي حاجة و ارتحتو منها (الماء، العصير، بسكويت، شيبس….)

وتنجمو تاكلو البرة كيما تنجموتكسرو الريتم وتعملو ضحكة في الكوجينة و اتطيبو مع بعضكم و الفائدة في لمة الكوجينة و الضحكة.

حبيت انقوللكم زادة إلى راهو كي نمشيوا نحوسو موش لازم ناكلو كان في الريستورونات الغالين، الروح متاع الخرجات هاذم هو انك تعيش ماغير حتى كومبلاكس و عقدة و ترتح روحك (جينيرالمون صحن كامل في مطعم شعبي يكون بين 4 و 6 دينارات تلقى فيه دجاج و الا اسكالوب سلايط و مقرونة والا تستيرة.

و حط في بالك إلى كل ما تبعد على العاصمة كل ما تكون الكونتيتي متاع الماكلة أكثر هههههه) و بالطبيعة كل مدينة عندها ماكلتها إلى لازمك تجربها و تذوقها.

المحواس :

لازم تحطو في بالكم إلى من وقت ما تشدوا الثنية وانتوما تحوسوو مافمة حتى شيزاربكم. كان تعديتو من بلاصة مزيانة وقفوا الكرهبة واهبطو تصوروا و كان شتهيتوقهيوة والا تحريشة ماترجعوهاش التالي. جربوا احكيو مع الناس و تبسموا للدنيا و لناسها. و كل مدينة ماشينلها ڨوڨلويها (فعل من كلمة ڨوڨل) اتو تلقاو المتاحف و البلايص المزيانة إلى لازم تمشيولها و انا متأكد إلى كل ماتمشيولبلاصة باش تزيدوتكتشفو تونس قداش غنية

الكاستينغ :

الدنيا نفوس و الخرجات هاذم لازمهم ناسهم باش تعملو جو و أبرز ناس لازم يكونوموجودين :

**المغروم بالتصوير و هكا تسلكوها في التصاور و موش واحد ينطر عليك كي تقولو صورني

**الضحاك و الي ديما تلقاه يقول في نكت ساعات ماسطين اما يضحكو

**موزيكجي والا واحد صوتو مزيان باش يعدي النهار يغنيلكم و زيد ينجم يكون هو الديجي متاعكم في الكرهبة و يتلها بالغناء

و فمة ناس انجموا نكونوا نحبوهم اما يقلقونا في خرجات كيف انهكا كيما:

** الي ديما يقنقنو ما يعجبو شي و يتنبز فيسع و كل تفدليكة ياخوها بجدو

** صاحبتنا الي ما تخرج كان لابسة مليح وتخاف على الكوب متاع شعرها وضوافرها الي عاملتهم عند سنتر درا شكون

**الي يحب كل شي منظم و كل شيء مسطر باللحظة

نصيحة مجرّب:

**مايلزمش تكونو أكثر من 3، 4 أشخاص في الكرهبة باش تبداو مرتاحين و موش تحموا في بعضكم. و زيد اقراو حساب سيكانكم و الحاجات الي تنجموا تشريوهم( ومافيها باس كان طلعتوا شكون معاكم ستوب). و من المستحسن كان إلى معاك فيهم شكون يسوق زادة باش ترتحوا على بعضكم

**اونو، رامي والا شكبّة و هاذم تستحقوهم كي تحبو تلعبو والا تعديوسهرية في الدار و تصنعو جوكم

** باور بانك و شارجورللتاليفون إلى لازمو ديما يكون محلول باش كان حبيت تاخوتصاور والا تكلم شكون

**الساك ادو ولاد و بنات  مايتعبش في الهزان و مايتنطرش بسهولة

**تنجموتعملو حسبة صغيرة و تعطيو الفلوس لواحد برك و هو الي يصرف و يخلص القضيات و الايسونس

**كي تبدأو قروب ماذابيك تمشي بالريتم متاعهم موش متاعك. موش حلو قداش من واحد واقفين يستناو فيك تتصور مع جمل والا تقيس في قشابية.

هاذم حاجات صغيرة تنجموا تعملوهم و ماغير برشا فلوس و تتفرهدوماغير فيزا و جوجمة كونجيات.

بالطبيعة ماغير ما ننساو لمة نهار الأحد مع العائلة في دار الجدود و ماتتصورش قداش كبار العائلة يفرحو كي يلقاو ولادهم و احفادهم دايرين بيهم و يشبعوا بالحديث معاهم (و زيد البروقرام هذا مايتكلفش فلوس)

Par Habib Trabelsi
 [:]