كيف تمشي لصالة سينما وإلا تياترو في تونس، تلقى ساعات (بش ما نقولوش ديما) أنواع متاع ناس تمصتلك الفيلم وإلا المسرحية. فيبالك ماشي تتفرهد تروح أعصابك موترة.
1- إلي ياكلوا الشيبس : وإلا أي حاجة أخرى محطوطة في باكو يعمل حس. هكاكة ينجموا يخرووشوا على راحتهم ويعديولك وقيت يعمل 66 كيف.
2- إلي يوسخوا : كيف يقوموا تقول فما مصب زبلة تحتهم. قشور متاع قلوب على قطانية مفرتة على باكوات الشيبس والشكلاطة والكاكي ودبابز الماء والقازوز الفارغة، و و و و و…..
3- إلي يحكيو : وماخذين راحتهم تقول في صالة دارهم. وجرب سكتهم تولي إنت إلي بيك وعليك.
4- إلي يحكيو في التاليفون : لا يزي يخليوه ينوقز وزيد يهزوا ويحكيو بالقوي من غير حتى مشكل.
5- إلي يضحكوا على اللقطات « الجريئة » : إيه نعم مازال فمة منهم. ويترشقوا بالضحك حتى على جرد بوسة وزيد يعديو ربع ساعة يحكيو عليها.
6- إلي يجيو إمخر : يقول القايل تصير على الناس الكل. صحيح. أما هوني نحكيو على إلي كيف يجيو إمخر يبقاو ساعة واقفين قدام العباد يلوجو على بلاصة باهية من غير حتى قلق.
7- إلي ما يسيبوش التاليفون : فيلم كامل وهما يشاتيو وضو التاليفون يجهر فيك وكيف فمة ضحكة ما يحرموش رواحم زادة.
8- إلي يصوروا : قبل ما يبدا الفيلم وإلا كي يوفى انجم نفهم. أما في وسط الفيلم ؟ وبالفلاش زادة.
9- إلي يعلّقوا : بالقوي زادة « شو شو اش عمل ! » ؛ « سمعت شنوا قالتلو ؟ » ؛ « زعمة بش يموت البطل؟ »…
10- إلي يرقدوا : تصير أما كي يشخروا يقلقوا… وفمة زادة إلي يروحوا قبل ما يوفى الفيلم وإلا المسرحية بالهلالو بيان سير.
بونيس : إلي يبزنسو !
