Désolé, cet article est seulement disponible en arabe. Pour le confort de l’utilisateur, le contenu est affiché ci-dessous dans une autre langue. Vous pouvez cliquer le lien pour changer de langue active.

هاو 15 أكتوبر جاء, و ان شاء الله كل عام و انتومة بخير و ربي ياحيكم لامثالوا . عاد وانا انخمم شنوة نكتب على هالعيد تذكرت فيديو دار عمناول وقت صحفية هبطت سألت شباب على 15 أكتوبر وشنوة الذكرى متاعو. فيديو يحمم القلب أما انا متأكد الي فمة برشا كيف وليداتنا الي لا يفرقوا بين عيد استقلال ومولد والا عيد شجرة كان بالماكلة الي إنطيبوها فيه والمهم أنو نهار فيشطة.

و15أكتوبر بخلاف انو يوم المعلم في البرازيل والعالم الكل يحتفل فيه باليوم العالمي لغسل اليدين نحنا في تونس نحتفلوا بذكرى غسلان يدين و تمضميض الفرانسيس على تونس. تي أي معناتها عيد الجلاء وخروج أخر جندي فرانساوي من بنزرت. اما النهر هذا ماجاش وحدوا وهاذم حاجات لازم نعرفوهم على عيد الجلاء

1/ علاش الجلاء من بنزرت موش من أي مدينة أخرى؟

لا يا بابا موش على خاترها في الشمال و على البحر ههههه اما tout simplement    على خاتر عام 1942 الباي التونسي صحح مع الفرانسيس ورقة تقول انو بنزرت بمنشأتها الحربية و العسكرية وحتى البحر الي داير بيها هي على ذمة الفرانسيس و قريب يقولوا الي هي موش تابعة تونس ( هو الواحد كي يشوف الحال توة يقول يالطيف ههه) المهم ففرانسا كانت تعتبرها ولاية بحرية ليها من ماتلين للناظور و الخروبة و من سيدي احمد حتى للجبل الكبير و منزل بورقيبة

2/الجلاء قبل الإستقلال والا بعدو؟؟

العقل البشري يقول أنو نعلنو استقلالنا بعد ما انطردوا جنود الاحتلال اما نحنا في تاريخنا لا على خاتر بعد الإستقلال فرانسا بدات تكركر في الخروج ويمهطلوا في الحكومة التونسية لين جاء 15 أكتوبر 1963 يعني من 20 مارس 1956 حتي اخر1963 صارو برشا حاجات.

3/المعركة تعملت على مراحل طوال

الازمة بدأت بالحق حسب المؤرخين عام 1958 وقت ما فرانسا عملت هجوم عنيف على سوق في ساقية سيدي يوسف و في ساعة البلاد تخربة و ماتو العشرات من نساء و صغار و قتها رجعت المطالبة الجدية بخروج الفرانسيس من تونس و صارو تضييقات من التوانسة على الفرانسيس ووصل القائم على الاعمال الفرنسية بدا يحتج على التضييقيات الي قاعدة تصيرلو ومن غادي بدات الرحلة هاو الحرس الوطني منع الفرانسيس من انهم يوسعوا مهبط الطيران ووصلت الحكاية في جويلية وين بعث والي بنزرت جواب للقائد العسكري الفرنسي وطلب منو باش الجنود متاعو ماعاتش يدورو في الشوارع

4/ التعبئة وقرار المعركة

في نفس الجمعة وبعد ما فرانسا رفضت التفاوض , بورقيبة عمل اجتماع شعبي قدام اكثر من 100 الف تونسي و حمّسهم على ضرورة افتكاك بنزرت من عند المحتلين و قعدت الحملات متاع التعبئة حتي لنهار انطلاق المعركة في 19 جويلية1961. ووقتها بورقيبة قال  » على كل راجل يسمع ندائي هذا لازموا يقاوم ويختار الموت على انو يسلم في سبر من ارض بلادو »

5/ العركة الصحيحة

وقتها كانو عنا شوية جيش وقوات تونسية أما المتطوعين الي هبطوا عددهم بالالاف و الناس الكل كانت متحمسة للجلاء و مسيرات في جل الولايات و الناس الكل طالعة تنظف بنزرت و حتى التباعد بين الأسلحة و القدرات العسكرية ماخوفش التوانسة الي صدموا كل واحد بالي عندو و نثبت فمة مرة راجل كبير يحكيلي قالي  » الصغر و برة يا حبيب معناتها الي هابط ببيوش والا ابالة و مسحة وماشي في مخنا باش انطردو الفرانسيس الي عندهم الأسلحة المتطورة  » هو الحقيقة الحكاية موش لوجيك اما لازم نعرفوا الي النهار الأول التوانسة نجموا يسيطرو على برشا بلايص كيما مركز التموين الفرنسي أمّا الرد كان سريع و قوي و جابو تعزيزات من الدزاير و حتى السكان الفرانسيس ولاو يضربوا في الكرتوش من شبابك ديارهم و ماتو المئات من المواطنين و بعد اربع أيام من المعركة الدموية مجلس الامن الدولي يصدر قرار يقضي بوقف اطلاق النار. وكملت الحكاية وهبط الأمين العام للأمم المتحدة لبنزرت وفي 27 اوت 1961 صوتت الجمعية العامة للأمم المتحدة بالأغلبية على ضرورة فتح التفاوض بين تونس وفرانسا للجلاء وقعدت الحكاية هاذي حتى لـ4 أكتوبر وين تم الإعلان على تاريخ 15 أكتوبر موعد للجلاء.

هاذي حكاية عيد الجلاء وتوته توته توته وخلصت الحدوتة وكل عام وانتومة بخير.

Par Habib Trabelsi