[:ar]

عسلامة, انك تكون تونسي موش كلام اكهاو اما فعل و عادات تستانس بيهم و تونس فيها برشا تجارب تعيشهم و برشا تراكن و حكايات ما يعرفوهمش الناس الكل و خاصة في الماكلة بما انو التونسي هنيه على ماكلتو قبل كل شي هههه. لا برسمي التونسي فنان في الماكلة و مخماخ زادة و اليوم باش نحكيلكم على بلايص كان مشيتولهم و كليتو فيهم راكم توانسة بالرسمي : 

1/ لبلابي عند ولد الكوميسار

اول ماتجبد علي اللبلابي, التوناسة يسميولك برشا بلايص معروفين و الناس الكل يمشيولهم اما التونسي الصحيح يدور يفلي الزناقي متاع باب سويقة و ياكل صحفة اللبلابي متاعو في نهج الكبدة , تلقي غادي حانوت عندو اكثر من 60 سنة و لليوم مازل محافظ على الطريقة متاعو و الجو متاع اللبلابي التونسي الصحيح

2/ كفتاجي عند عم حسين

كي تبدا ماشي في شارع غانة ماتنجمش ماتاقفش و تاكل صحين كفتاجي عند عم حسين  مطعم شعبي محلول من عام 1958, الكفتاجي تاكل وراه صوابعك و الحانوت ياسر مزيان بالفايونس و الديكور التقليدي

3/صحفة درع في باب الخضراء

في البرد متاع الشتاء هذا, الحل تلقاه في باب الخضراء وحوانت الدرع والسحلب الي تلقاهم على كل لون ياكريمة و كل واحد شنوة يزيدك عليه و تعمل صحفة الصباح و انسى روحك طول النهار

4/كويس تاي والا قهوة عربي في الصفصاف

قهوة عمرها اكثر من  100 عام، و فيها عين ماء طبيعي,و كي تمشي للصفصاف في الربيع والصيف تشيخ بزينة البلاصة و تعمل كيف بالموزيكا القديمة و الفوندو التونسي .و في قهوة الصفصاف زادة يتعملو عروض و لمات فنية و ماغيرماننساو ليالي الصفصاف الي يتعمل كل صيفية

5/ كورنو قلاس والا قرانيت عند عم سالم

للجيلاط في تونس عنوان و زميم القلاس التونسي هو محل  »سالم الصغير  » الي تحل من عام 36 في المرسى و من وقتها اب عن جد توارثو الخدمة هاذي و يقدمولنا من احسن القلاس والقرانيت في تونس.

6/ كاس ليموناضة و كعبة قيزاطة عند الناوري

شكون مابردش سخانة الصيف عند الناوري , ليموناضة بالوصفة التقليدية و معاها تلقا برشا حاجات كيما الكعك و اليويو و القيزاطة و حتى من وذنين القاضي

7/ كعبات فريكاسي والا بريكة عند عم ضو في باردو


Photo: On a Mangé Pour Vous*® 2.0

عمك ضو ومن 40 سنة  و هو يبيع في الفريكاسي و البريك  لين ولا الحانوت المفضل متاع التوانسة المخماخة و ديما كعبة الفريكاسي تتمد سخونة و بنينة و تشبع و البريكة تاكل وراها صوابعك و الرخص و البشاشاة….

هاذم شوية بلاصة من قائمة طويلة عريضة متاع حوانت مازالو لليوم محافظين علي النكهة التونسية التقليدية في ماكلتهم و من تونس العاصمة لباقي الجهات كل مدينة و تلقى  »ملك الماكلة فيها » وماانجمش ننسى كسكسي نهار الاحد الي يتلموا لعليه العائلات و صحة و بالشفاء.

Par Habib Trabelsi

Crédit photos: Foursquare

[:]